nytnaturen.no

Turopplevinger, turforslag, nyt naturen

Kategori: Stryn (side 1 av 6)

Tjønnane i Agjeldsdalen

Utsikt nedatt til gardstunet på Agjeld, Bergsida og ein del av Stryn.

Eg har lenge høyrt snakk om verdens finaste plass. Dette måtte eg finne nærmare ut av og ein fin haustdag var dagen for å utforske nytt terreng.
Eg tok kontakt med grunneigar og bonde på garden Agjeld. Garden ligg høgt og fritt på sørsida av Nordfjorden i nærheita til Olden.
Bonden fortalde at plassen, som ligg 634 moh, har namnet Høgefurehåjen. Der er to små tjønnar omkransa av flotte furutre og dei ligg litt aust for Agjeldsdalen.
Den største tjønna har berre ei lita sildre som utløp, men er med ujamne mellomrom plutseleg tom for vant. Nabotjønna er alltid full med vatn.

Parkering like før øverste garden på Agjeld.

Der er parkeringsplasser like før ein kjem opp i øverste tunet. Der er også utgangspunktet for turen. Der står skilt på ein bergnabb som viser veg til setra. Første stykke går på traktorveg opp beite.

Vidare går ein på flott setrerås opp dei bratte bakkane. Ein del arbeid var blitt gjordt for å tilrettelegge og utbetre råsa. Mange plasser var det sett opp tau, fastbolta i fjellet, for at ein trygt kunne ta seg fram. Også på steiner var der tillaga med sklitrinn for tryggare ferdsel.

Eit av dei to sela på Agjeldssetra.
Flott utsikt frå steinbordet på Agjeldsetra.

Turen starter på ca 170 moh og Agjeldsetra ligg ca 390 moh. Det er to sel og to fjøser på setrevollen. Ved steinbordet på setra kan ein finne roen i total stillheit mens ein nyt den flotte utsikta.
Turen går vidar i tydeleg rås bak fjøsen som står lengst til høgre. Råsa går langs Agjeldselva, Når ein har lagt bak seg ein del høgdemeter til kan ein skimte Agjelsfossen i himmelsjå. På ei stor myr, ved ca 600 meters høgde, som vist på bildet under, hold til venstre opp på høgda. Da kjem ein inn til eit større myrområde. Hold til venstre og ein har snart tjønnane framfor seg.

Hold til venstre før siste høgda under Agjeldsfossen.
Flott utsikt mot Hoven, Storskrefjellet og Skåla.
Utsikt mot nordsida av Nordfjorden.
Verdens finaste plass ved Tjønnane i Agjeldsdalen.

Turen frå Agjeld til Tjønnane i Agjeldsdalen er knappe 3 kilometer.
Kart over turen finn ein på Ut.no: Tjønnane i Agjeldsdalen.

Vær nyskjerrig og prøv turen. God tur!

Innvik – Olden via Hestehytta og Hornvasshytta.

Utgangspunktet for denne turen er ved parkeringplassen på Drageset, like før ein køyrer inn bomvegen i Innvikdalen.
Der er det god plass til mange biler.
Første stykke går på skogsveg, merka mot Remestøylen. Hold til høgre i kryssa på skogsvegen som går inn Dragesetmarka.
Etter vel 1500 meter på skogsvegen hold utkikk etter rås og raud sløyfe i venstre vegkant. Der skal ein ta av og gå over i råsa.

Råsa går no motebakka og gjennom eit granfelt. Den er merka så ikkje vanskeleg å følge den. Ein vinn fort høgdemeter og da kjem også utsikta.

Ved Nobba ligg råsa heilt på kanten.

Når ein kjem opp om skoggrensa ligg råsa heilt på kanten. Da har ein utsikt inn Innvikdalen til alle støylane.

Hestehytta ligg der fint ved det vesle vatnet.

Hestehytta ligg på 870 meter over havet og der er det panoramautsikt.
Svartkruttgjengen, ein gjeng jegere om ville ha eit krypinn, bygde hytta ca 1957-58. Den vart restaurert i 2015. Hytta står åpen og kan nyttast av alle. Vil ein overnatte er det lurt å ta kontakt med primus motor for hytta, Oddvin Drageset.
Tek ein pausen på sørsida av hytta er det fullstendig ro, med vatnet og fjella som selskap. Set ein seg på nordsida av hytta har ein heile distriktet som selskap, frå Ålfotbreen til Skålatårnet.

Fin utsikt mot Veslelogen, Storelogen og Storelogpiken.

Vidare går turen i god rås. Ved stidele aust for Hestehytta hold til venstre. Eg heldt for høgt opp mot Skarsteinfjellet og måtte seinar forsere ei stor steinur.

Terrenget er lett å gå i og snart har ein Agjeldsvatnet og Hornvasshytta i sikte. Hornvasshytta er privateigd. Olden i.l har trimpost ved hytta.

Agjeldsvatnet og Hornvasshytta. Kyrkjefjellet lengst bak med snø på toppen.
Ei privat hytte med panoramautsikt.

Vidare går no turen unnabakken, forbi ei privat hytte og vidare mot Skarsteinsetra. Flotte store varder og tydeleg rås viser veg. Det er berre å nyte utsikta mot det flotte landskapet som ligg framfor ein.

Skarsteinsetra med sine mange flotte setrehus. Frå setra og ned til bebyggelsen er det grusveg.

Skarsteinsetra med bla. Huaren, Skåla og Storskrefjellet bak.

Utfordringa på denne turen er logistikken. Om ein ikkje har mogelegheit for å ha to biler så bruk bussen eller kjentfolk som køyrer forbi for å kome tilbake til bilen ved utgangspunktet.
Turen er ca 15 kilometer frå Drageset og heilt ned til RV 60 på Skarstein. Der er nokre få parkeringsplasser på Skarstein der skogsvegen kjem ned til frå setra.

På ut.no ligg ein variant av turen der ein går via Remestøylen: Innvik-Olden (Remestøylen-Skarsteinsetra)

GOD TUR I NYDELEG TERRENG.

Rundtur i Innvik

Denne turen i Innvik er innhaldsrik på terrengtypar. Du går på fine skogsvegar, bratte oppstigning, flatare terreng med stor furuskog, høge hamrar og utsiktspunkt, store myrområder med tjønner, utsikt til fjorden og bygdene rundt. Eg skal prøve å guide dokke gjennom turen som er ca 9 kilometer. Som de ser av bildet under, er her mange andre turer å velge mellom. Vær nyskjerrig og utforsk nytt terreng.

Kart med innteikna turstier på Innviksida av Hildahalsen.

Merking og skilting på denne turen, og dei andre turane i området er utført av ildsjeler i bygda. Sjå etter små brune skilt langs turen. Du finn både retningsskilt og namneskilt på plasser du passerer.

For å kome til utgangspunktet for denne turen, ta av til venstre i Innvik sentrum. Følg Dragesetvegen til ein knapp sving etter Langvin. Parker ved starten på skogsvegen.
Følg den øverste skogsvegen i lett og slakt terreng. Du går forbi Meelva og Hildaelva før du skal sjå etter skilt i vegkanten på høgre sida, merka Gaddane. Her går turen over i rås og terrenget blir brattare. Etter kvart som ein vinn høgde kjem også utsikta der det er lysningar i skogen.
Etter ein del stigning krysser ein ei lita elv oppunder høge hamrar og fortset råsa til høgre. Her er det fin utsikt nedatt i deler av bygda.
Fremdeles litt stigning før ein kjem til stidele der ein skal følge skilting til Tjønnane. No endrere terrenget seg og det blir slakare. Ein går i stor furuskog mot Åsefjellet.

Frå Gaddane til Åsefjellet går ein i stor furuskog.

Utsikta frå Åsefjellet og over store deler av Innvikbygda er storslagen. Ein ser også over til Ulvedalsneset, fjella mot Gloppen og Bergsetnakkjen.

Innvik og Innvikfjorden sett frå Åsefjellet.

Frå Åsefjellet går turen bakover til Tjønnane og Geitaberget som er turens høgaste punkt, 580 moh. Ein kjem opp i eit stort myrområde med mange tjønner. Råsa går i venstre kant av myra. Ta av frå råsa og gå innover eit stykke så ser ein fleire tjønner. Dette er eit naturreservat og freda for å ta vare på ein sjeldan kombinasjon av myrtypar og det naturlege plante- og dyrelivet i området.

Store myrområder ved Tjønnane. Fin utsikt i alle himmelretninger også. (Foto: B.Svarstad)
Utsikt til Stryn sentrum og fjella bak.

Frå Tjønnane går råsa til Geiteberget og vidare i god rås framover Hildahalsen. No er det lett terreng og ein får god tid til å studere landskapet på andre sida av fjorden. Ein ser Blaksæter, Sætren, Robjørgane, Faleide og ein del av Markane.
Etter ca 1 kilometer kjem ein fram på skogsvegen gå den vidare ca 1 kilometer. Sjå etter blå merker/sløyfer på venstre side. Følg den blå merkinga unnabakka og vidare inn lia i god rås. Terrenget ein no går i varierer mykje, frå stor furuskog, gammal lauvskog, høge hamrar, store steiner, granskog. Heile tida med gode merkinger å gå etter.

Kan sjå vanskeleg ut, men det går fint.

Eit stykke etter Klypesteinane kjem ein til eit nytt stidele. Her står det mange skilt på treleggen. Følg merking til Bolljeberget. Ved toppen av bakken ta ein avstikker gjennom granfeltet til Holenova. Der er fin benk å ta ein pause på for å nyte stillheita eller aktiviteten i jordbruksbygda.
Vidare går turen i tydeleg rås gjennom flott granfelt til Bolljeberget. Ein ser tydeleg at entusiaster har jobba med å få til ei fin rås til glede for andre turgåere.

Det skal ikkje være vanskeleg å kome seg fram. Foto: S.Frøholm

Etter å ha klatra stigen kjem ein fram på Bolljeberget. Ein nydeleg plass å ta ein pause. Og ildsjelene har virkeleg laga det fint til. I tillegg til desse stolane er der bord og benkjer. Heile familien kan ta ettermiddagskaffien her.
For no er det ca 200 meter til ein kjem innatt på skogsvegen igjen. Så om ein vil gå ein kortare tur, følg skogsvegen til rundkøyringa og gå dei siste meterane i rås til Bolljeberget.

Flotte stoler å kvile i.

Turen er ca 9 kilometer og med ein høgdeforskjell på 450 meter.
Kart over turen finn ein på ut.no: Rundtur i Innvik

GOD TUR!!!!


Skårsetra i Nedstryn

Utsikt til Storesunde og Mindresunde frå Nymarkvegen.

Stryn kommune har ca 100 setrar og Skårseta i Oppstryn er ei av dei. Setra ligg på ca 650 moh og høyrer til gardane Skår, Garlid og Bakkelid.
Som ved mange av dei andre setrane rundt om i kommunen er den gamle setreråsa blitt erstatta eller avskoren av skogsvegar, eller ein har valgt å legge utgangspunktet for turen til setra utanom tuna som der folk lever og bur.
Denne turen til Skårsetra startar ved Nymarkvegen, ein skogsveg som tek ein enkelt opp i terrenget, og som også er utgangspunkt til andre turmål.
For å kome til utgangspunktet tek ein vegen frå Storesunde mot høgdegardane Skår og Garlid. Etter ca 1.5 km kjem ein til Nymarkvegen. Der kan ein betale bomavgift og køyre vidare ca 1.5 kimometer. Eg anbefaler å parkerer bilen å gå heile vegen til setra. Det er 3 kilometer, delvis på skogsveg og delvis i rås.

Mange turalternativ ved starten av Nymarkvegen.

Ved starten av Nymarkvegen er det godt skilta til setra og mange andre turmål i området.
Følg skogsvegen i svinger opp lia. Vær obs i kryssa. For turen til Skårsetra følg merking til Kyrkjenibba. Etterkvart kjem ein til skilt på venstre side som viser veg til Kyrkjenibba/Skårsetra. Der går ein over i rås.

Etter litt stigning i rås kjem ein fram til Bjønnstejen. Dette er etter gammalt eit naturleg kvile når det var setring på setra. Her i frå flater råsa ut. Det er sett opp mange skilt med namn på plasser langs råsa.

Garlidmyrlada, ei fin lita bu på gamle murer.

Litt forbi Garlidmyrlada kjem ein innatt på skogsveg. Råsa til setra, som fremdelse blir nytta for å føre beitedyr til fjells, rasa ut under ekstrem veir. Denne skogsvegen vart laga for å få maskiner fram for utbetring av råsa.

Skogsvegen ligg fint i terrenget og gror snart fint til.

På vegen opp til setra kan ein sjå over til Kopasetra, setra som høyrer til Gjørven. Der er hengebru over elva, ca der ein kjem innatt på skogsvegen forbi Garlidmyrlada.

På Skårsetra står det tre sel og to fjøser, alle godt vedlikehaldne. Det var slutt med setring rundt 1955.
Vil ein gå vidare mot Kyrkjenibba er der bru over elva ca 150 meter bakanfor setra.

Turen til setra er ca 3 kilometer og med ei stigning på ca 450 høgdemeter frå bomavgiftskassa ved Nymarkvegen.

GOD TUR TIL SETERS.

Tjønnane på Hildahalsen

Innvik har mykje fint turterreng. Denne turen går på skogsveg  frå Hildaneset til Tjønnane. Ein tur som er knappe 7 kilometer ein veg og som har ei stigning frå 0 til ca 580 moh. Utgangspunket for turen er ved skogsvegen på Hildaneset. Der er plass for parkering til nokre få biler. Skogsvegen ligg på nordsida av Hildahalsen og utsikta til Nordfjorden, fjella og bygdene på nordsida av fjorden er flott. Bygdene ein ser er Robjørgane, Sætren, Svarstad, Faleide og Bergsida.

Når ein kjem endå lenger opp i høgda får ein flott utsikt ut fjorden. På venstre sida ser ein dei siste gardane i Innvik og deler av Utvik, Ulvedalsneset med gardane på Ulvedal og Roset på høgre sida.Frå Hildahalsen er det mange merka ruter ned til bygda. Terrenget er hylleforma og det er viktig at ein føl dei merka stiane. I siste del av innlegget har eg lagt med eit kart der dei forskjellige rutene er teikan inn og med beskrivelse av turane.
    

Dei første 3 kilometerane av denne turen er skogsbilveg deretter går det over til skogsveg med litt grovare underlag, men likevel enkelt å ta seg fram.Ved skogsvegenden,  ca 450 moh, er der fin plass å ta ein rast før ein går over i rås den siste kilometeren. På denne turen møter ein ikkje så mange turgåarar, men absolutt eit område å anbefale fleire å utforske. Nydeleg og lett terreng innover Hildahalsen mot Tjønnane.
Tjønnane er eit naturreservat.  Tek ein eit googelsøk på Tjønnane naturreservat får ein straks utvida horisonten om myr- og torvartar.Utsikt mot Stryn sentrum med Gryta og Årheimsfjellet.Frå Geitaberget (der trimposten står) går det merka sti vidare mot Drageset. Har ein mogelegheit så kan ein parkere ein bil der og ta heile turen frå Hildaneset til Drageset. Tek ein den turen passerer ein råsa som går til Høgefossen. Ein foss som ein kan gå bak om. (arkiv: Høgefossen og Langhamrestova).
     

Området ved Tjønnane er dominert av forskjellige myr og torvarter. Det særmerkte med Tjønnane naturreservat er at der er både strengmyr (som er knytt til innlandsklima) og terrengdekkandemyr (som krev kystklima). Les meir om naturreservatet her.November kan være ein fin månad å utforske nytt terreng på.  All slags veir og årstid har sin sjarm og det kan ikkje alltid være knall blå himmel og sol. Det var ein flott opplevelse å sitje her og sjå på den speilblanke tjønna og korleis vinden kom i kraftige kast og laga mønster i vasskorpa.

Bilde med innteikna turruter og beskrivelse av turane laga av lokalkjent mann frå Innvik. Mange alternativ til fine turer i denne delen av kommunen.Turen frå Hildaneset til Tjønnane er knappe 7 kilometer ein veg.
Kart over turen ligg på Ut.no: Tjønnane på Hildahalsen

GOD TUR I NYDELEG TERRENG.

 

 

 

 

Bjørnakjelda høgt over Loen

Denne turen er ein bratt tur opp til ei hytte som ligg høgt over Loen.  Ein kan sjå hytta frå Loen sentrum og frå bilvegen når ein kjem køyrande frå Olden. Hytta er eit sameige i Loen.

Utgangspunktet (som vist på bildet under) er ved skogsvegen som går til venstre like før Tjugen camping.  Skogsvegen er fin å gå på og tillaga med steinklopper over små elver.
Dette er også utgangspunkt for tur til Lohøgesetra og Årheimsfjellet.
    
Like før ein kjem til brua som krysser Hagedøla skal ein ta til høgre. Denne råsa er ikkje merka og kan være litt vanskeleg  då det ligg i eit granfelt. Når ein  har tatt til høgre like før brua så drei mot venstre opp bakkane og ein vil finne tydeleg rås. Ein skal passere den krokete granleggen som vist på bildet under.
   
Ein går i skogsterreng og bratt rås. Muskelaturen og pusten får trena seg skikkeleg.
Enkelte plasser får ein ei åpning i skogen og flott utsikt nedatt til bygda.Når ein kjem høgare opp er råsa merka med raude prikker på stein og trelegger. Spessielt rundt og mellom desse hamrane var det godt med merking. Viktig i ukjent og ulendt terreng å vite at ein er på rett spor.
Etter knappe 3 kilometer og ca 700 meter stigning er ein ved hytta.
Det har blitt fortalt at hytta har fått namnet fordi her er einaste plassen ein finn rennande vatn i området og ein bjørn vart ein gong observert her, ståande å drikke ved denne kjelda.
Hytta ligg fint ut på kanten og det er flott utsikt ned att til Loen og Lovatnet. I aust kan ein sjå Skåla, Vesleskåla, Skålelva og råsa som snirkler seg opp bakkane til det populære fjellet. 
Kart over turen ligg på Ut.no: Bjørnakjelda høgt over Loen

NYT TUREN, STILLHEITA OG UTSIKTA !

 

Den gamle kyrkjevegen i Hjelledalen.

For dei som budde på nordsida av Hjelledalen var det denne gamle ferdselsvegen  som vart brukt når dei skulle til Hjelle på handel, til kyrkja på Fosnes eller hadde andre ærend ut av bygda.
Dei fleste suser no gjennom Hjelledalen på veg aust- eller vestover med fokus på asfalten og gulestripa.
Ta denne rolege turen og sjå Hjelledalen frå ein ny vinkel.
Turen går fra Hjelle  til Nygård og strekninga er ca 3,5 kilometer.
Utgangspunktet er ved den smale brua som går over elva Hjelledøla.  Her tek ein til høgre innover forbi det gamle skulehuset. Finn parkering  på sør sida av elva eller ved Hjelle skule og barnehage når der ikkje er skuleaktivitet.

Den gamle skulen var eit av  dei  første skulehusa som vart bygd i Oppstryn. Her var det skule fra 1882 – 1975.  Det var skule for Hjelle, Enebakk, Sigdestad, Glomnes, Vollsnes og Bolstad.
Skulehuset er no i privat eige og blir leigd ut til turister.I tillegg til fin turveg blir vegen også  brukt som tilkomstveg til dyrka mark på jordet som ligg ovanfor grustaket,  Vollsnes.
Langs stien er det sett opp plakater med informasjon om dei forskjellige plassane.
  
Ved grustaket har det tidlegare vore eit stort jorde i høgd med det ein kan sjå bak grustaket.  På 1970 talet då heilårsvegen over Strynefjellet vart bygd, vart det sett opp asfaltverk her. Det var god tilgang på grus og mykje grus vart tatt ut. Vidare frå grustaket går stien langs elva. Denne stien blir brukt av elevane ved Hjelle skule når dei  har uteskule/undervisning  i Bombeneset.  På veg opp stien kan ein sjå ein  målestasjon som måler vass standen i elva.På høgre sida, like før ein kjem i Bombeneset,  kan ein krysse elva på Kleivabrua og kome bort på vegen igjen som går til Hjelle. Tek ein turen over elva finn ein plakater med kulturhistoriske opplysninger.
Det første ein kjem til om ein tek turen over brua er Truskeverksvingen. Her stod truskeverkhuset til det vart tatt av uksefonna i 1979. Truskeverket vart etter det flytta til Folven.
Går ein vidare på vegen mot Hjelle kjem ein til Mykjedalane. Her blei steinmasser fra arbeidet med Hjelletunellen tippa i 1974-1975. Under steintippen ligg den eldste daterte kornåkeren i Sør-Norge. Den er datert til å være frå ca år 2200 f.Kr., altså frå slutten av steinalderen. Her er også funne spor etter busetnad frå rundt yngre bronsealder. (Kilde: plakat, Oppstryn skule og barnehage).
Denne avstikkeren er fin å ta på tilbaketuren om ein går tur retur Nygård.
  
Bombeneset har namnet sitt etter matbomber. Før i tida når folket på Bolstad arbeidde på markene hadde dei matpausane på denne plassen. Her står ei utelade som er flott restaurert og som Hjelle skule og barnehage brukar i si undervisning ved uteskulen. Utelada har fått namn etter ein tidlegare eigar.  I terrenget bak utelada er eit flott område der elevane får utfolde seg og være kreative i leiken. Her har dei også epletre, pæretre og plommetre som dei haustar frukter av. I tillegg har dei åker i området der dei dyrkar poteter og grønnsaker.
I Bombeneset var det i tidlegare tider ein husmannsplass. Ein kan framleis sjå murar etter ei gammal utelade som stod her. Den vart tatt av fonnvinden etter uksefonna i 1979.Fra Bombeneset går turen vidare på traktorveg til Bolstad. Her ligg fleire gardstun i klyngetun.
Den raude stova på bildet er huset der far til komponisten Per Bolstad kom fra.På turen har ein fin utsikt til dei mektige fjella i Oppstryn og Hjelledalen. Og med bøndenes raude lader, grønande marker, snødekte fjell, blå himmel og fuglekvitter er det berre å nyte turen. Denne turen stopper ved Nygård camping, ein av fleire overnattingsplasser i Hjelledalen. På Nygård camping har dei hytter, bobilplasser og teltplasser. 

Turen fra Hjelle til Nygård er ca 3,5 kilometer.

Kart over turen ligg på ut.no: Den gamle kyrkjevegen i Hjelledalen

GOD TUR!!

Maurset- Øyesetra-Maursetsetra-Maurset

I dei fleste bygder kan ein sjå setrar/støylar langs lidene, gjerne i skogvakse. Før var det setreråsa som var den faste vegen til setra, men mange av desse setreråsene er no øydelagde av skogsvegar. Ein kan framleis finne deler av dei gamle setreråsene.  Då det var setring rundt om på setrane var det også mange plasser reser mellom setrane som låg nær kvarandre. Budeiene brukte gjerne fristondene sine og helgane til å gå på besøk til nabosetra.
Om det var aktuelt mellom desse setraen som eg skal skrive om her veit eg ikkje, men der er ei gammal rås mellom Øyesetra og Maursetsetra.

Råsa mellom Øyesetra og Maursetsetra vart for ein del år sia rydda og merka. Denne turen er det ikkje så mange som går, sikkert fordi ein ikkje veit om at der er  rås.  Det er ein fin rundtur med mogelegheiter for å forlenge den mot Grendasetra, Holesetra, løypetrasen og bilvegen tilbake til utgangspunktet.
Eg har tidlegare skreve om turen fra Maurset til Øyesetra. I det innlegget står det beskreve utgangspunktet og første del av denne turen. Det innlegget finn ein her: Øyesetra, Markane. 
Fra Øyesetra går ein lida omtrent i same høgde mot Maursetsetra. Utgangspunktet fra Øyesetra er i øverst hjørnet på setrevollen mot aust.
    Tilbakeblikk til dei to sela og fjøsen. Råsa er ikkje like tydeleg alle plasser, men der er raude merkjer på steinar og treleggane.
   
Fine plasser for pause og med utsikt nedatt til gardane på Maurset. Fine haustdager, når det gjerne er skodde i lavlandet er det sol på denne turen.
  
Det er ein fin rundtur som også kan gjerast lenger. Fra Maursetsetra kan ein gå vidare mot Grendasetra og Holesetra. Da har ein plukka mange setrar på ein tur.
Maursetesetra er setra til gardane på Maurset og Ytre Hatledal. Her i fra har ein flott utstik mot deler av Maurset, Ullsheim skistadion, gardane i Grenda, Svingesetvatnet og mot fjella i sør. Fjorskodda ligg tjukk i lavlandet.Fra Maursetsetra kan ein ta råsa til Ullsheim (den går mot aust i nederste hjørne på setrevollen) eller den gamle setreråsa mot Maurset. Den går først vestover før den snor seg ned bakkane. Det er ikkje så mykje merking, men om ein les terrenget litt så finn ein fram. Enkelte plasser kan ein sjå små skilt som heng på trea. I myrområda er der raudmåla stikker.    
Etter å ha gått over ei stor myr med raude stikker ser ein eit stort rotevelte. Like bak det kjem ein fram på skogsvegende. Den er fin å følge tilbake til utgangspunktet.
 Denne rundturen som eg har beskreve her er knappe 6 kilometer og med ein høgdeforskjell på ca 360 meter.

Kart over turen finn ein på Ut.no: Maurset-Øyesetra-Maursetsetra-Maurset.

GOD TUR!!

Glomsdalen

Høge fjell med snø og skydotter og det blågrønne Oppstrynsvatnet er ei fin ramme på dei mange flotte turane som ein kan gå i Oppstryn. Ein av dei er turen inn Glomsdalen.Glomsdalen går i nordleg retning fra Oppstrynsvatnet. Fra den opparbeida parkeingsplassen like ved gardane på Glomnes og til botnen på dalen er det vel 10 kilometer. Til setra Stol er det knappe 9 kilometer. (litt feil på skilta).
Høgdeforskjellen fra utgangspunktet og til setra er vel 600 meter.
Allereide før turen har starta får ein flotte inntrykk av den mektige naturen som omkranser Oppstryn.
Glomsdalen er ein god beitedal og det er i alt fem setrar i dalen.  Stol er den som ligg lengst inn i dalen.Glomnes er også utgangspunkt for den populære turen til fjellgarden Segestad. For å sleppe biltrafikk gjennom tuna på Glomnes er det parkeringsplass ved utgangspunktet til Glomsdalen. Her betaler ein selvfølgeleg parkeringsavgifta dersom ein nyttar plassen.
Utgangspunktet for turen til Glomnessetra og Stol er gjennom grinda like ved parkeringsplassen. Skal ein til Segestad går ein grusvegen gjennom tuna og føl merking derifra.
Første del av turen gå i utmarka langs bøgarden og i gammal skog. Setrevegen er tydeleg så ikkje problem å finne fram.

 
Etter å plukka dei første høgdemeterane kjem ein til ei lysning i skogen og får flott utsikt nedatt til gardane på Glomnes.Setrevegen ligg fint, men bratt opp Kleivane. Etter gamalt er det to kvile på veg til Stol. Det første ligg på høgda (ca 360 moh) bak Glomnes og har fått namnet Kvileflåten. På Kvileflåten flater terrenget ut og det går slakt innover til Glomnessetra. Eit skilt viser veg til Glomnesnakken.
  
 
Glomnessetra høyrer til dei to bruka på Glomnes. Her var det to sel og to fjøser. På setra er det i dag to hytter av nyare dato som står på gamle selmurar. Der står også rester av gammalt setrehus av stein. Litt lenger inn i dalen fra Glomnessetra er det laga ny bru over elva Glomsdøla. På andre sida av elva kan ein  sjå ruinane etter Segestadsetra.  Bygningane på denne setra er bygd attåt store steinar slik at ein sparte å bygge ein vegg. På Segestadsetra var det slutt på setringa på 1930-talet.
  
Frå Glomnessetra går dalen vidare i slak stigning. Heile tida på venstre sida av elva.  Ein del småskog er det på dette «midt» partiet, men ikkje vanskeleg å ta seg fram i den tydelege råsa.
Glomsdalen kan være skummel om vinteren. Store snøskred kjem fleire stader ned dei bratte fjellsidene og går tvers over dalen. Desse fonnene blir liggande lenge i dalbotnen og ein må være ekstra forsiktige når ein krysser dei. Våren tiner rasa også fra undersida og danner farlege snøbruer.
Etter kvart får ein auge på setra Nos/Bolstadsetra på andre sida av elva. Alle sela vart bygd av stein.Nokre av sela hadde fjøs i underetasjen. No er forfallet av steinbygningane komt langt. Ei ny hytte er sett opp litt høgare oppe. Det var slutt på setring på slutten av 1930-åra på denne setra.Ca halvveis på vegen til Stol dreier dalen og ein kan no sjå inn i Stolsbotnen. Til høgre ligg Stolskaret og Sandskarhyrna.

Midtstøylen har fra tidleg på 1900-talet vore støylen til Åning og eit bruk på Brekke. Selet er bygd med vernemur mot snøskred. Nede ved elva kan ein sjå ruinar etter bygningar fra farne tider.Stol ( 689 moh) er setra til gardane på Nesje og Brekke. I alt sju sel er det på setra. Mange ganger har sela vorte  øydelagde av uveir og snøras, men alltid bygd oppatt.  Det er lang veg for dei som har seter og beiterett på Stol.  Før vegen rundt Oppstynsvatnet vart bygd i 1924, rodde dei fra Nesje til Glomnes med krøttera før dei tok fatt på den lange vegen inn Glomsdalen. Det var slutt med mjølkekyr innerst i Glomsdalen på slutten av 1800-talet.

At det lusker rovdyr i vår flotte natur fekk eg og ei venninde oppleve. Ein jerv kom langs lida og rett mot setrevollen der vi sat og kosa oss med nista og kaffien. Jerven hadde nok sauene som beita på setrevollen i sikte, men vart skremt da den vart var oss på ca 60 meters avstand.

TA TUREN TIL DENNE FLOTTE STILLE DALEN MED FEM SETRAR.

Bødalsseter – Bødalsbreen

Lodalen er spektakulær og sjarmerande. I denne trange dalen finn ein roen sjølv om det også kan være ei spessiell stemning blandt dei bratte fjella. Ein kan ikkje la være og tenkje på tragediene som har ramma dalen.
Både i 1905 og i 1936 løsna store ras frå Ramnefjell. Desse rasa raserte bygdene Nesdal og Bødal og tilsaman 135 mennesker mista livet.
   
Ved enden av Lovatnet deler vegen seg, til venstre mot Bødalen og til høgre mot Kjenndalen. Begge  vegane er bomvegar og for vegen til Bødalen betaler ein ved automaten i krysset. Til Bødalsetra er det knappe 5 kilometer og vegen har asfalt og oljegrus. Det er ein bratt og smal veg og høver ikkje buss eller bobiler.Fra parkeringsplassen på vegenden til Bødalsetra er det traktorveg og det tar ca 10 minutter å gå.  Bødalsetra  ligg i Jostedalen Nasjonalpark ,på ei stor slette 585 meter over havet. Kvart bruk i Bødal hadde sel og fjøs på setra. Før eit snøskred øydela setra i 1893 stod sela og fjøsane spreidd på sletta. Då dei vart bygd oppatt vart alle sela sett på ei rekke med fjøsane på ei rekke bak. Etter rasulykka i 1936 har det ikkje vore seterdrift på Bødalsetra.Det er høge fjell om omkranser setra og setrevollen. På bildet over kan ein så vidt skimte ei arm av Skålebreen. På bildet under ser ein sela og fjøsane stå på rekke. Ein kan også så vidt skimte ei arm av Tindefjellbreen.Bødalsetra blir nytta til brekurs og ulike ungdomsleirar og gardbrukarane har sett opp inngjerda teltplass med varmestove og toalett. Her på setra er også utgangspunkt for turen til Lodalskåpa (2083 moh).
Råsa innover dalen fra setra er tydeleg og godt tilrettelagt. Eit skilt står og viser veg. God og trygg bru over Bødalselva er for både folk og beitande dyr. Råsa snor seg fram inn dalen i lav bjørkeskog.
  
   
   
Ein kjem til eit stidele og skilta viser tydeleg veg vidare. Bødalsbreen ligg til høgre og vegen til Fessene og Lodalskåpa går til venstre. Råsa/vegen vidare inn til breen er flott å gå på. Berre siste stykket er det litt steinete i råsa.   

 

 

Eit panoramabilde over terrenget . Sætrevatnet er stort og grønt. Elvane som ein ser kjem fra Kåpevatnet og Bohsbreen.

Breen ligg langt oppe i fjellsida, men ein må respektere skiltinga og ikkje gå nærmare. Ta ein god pause og nyt stillheita. Ein har også god utsikt tilbake til Sætrevatnet og Grandane.
Den dagen eg var inn til breen var det heilt stilt. Flott veir og ikkje andre turister å sjå. På turen nedatt vart eg oppmerksom på noko som rørte seg på vatnet. Når eg kom nærmare fekk eg sjå sju ender som kosa seg på vatnet. Det kunne sjå ut som dei dreiv med synkron svømming.


Kart over turen ligg på Ut.no: Bødalssetra – Bødalsbreen

TA TUREN TIL DENNE STILLE PERLA.

« Eldre innlegg

© 2019 nytnaturen.no

Tema av Anders NorénOpp ↑